സ്ത്രീകളിലെ നിക്ഷേപ അവബോധം ലക്ഷ്യമിട്ട് എച്ച്.ഡി.എഫ്.സി. മ്യൂച്വൽ ഫണ്ടിന്റെ ‘നാരി നിവേശ് യാത്ര’ ആലപ്പുഴയിൽ

ആലപ്പുഴ: സ്ത്രീകളിൽ നിക്ഷേപത്തെയും സാമ്പത്തിക ആസൂത്രണത്തെയും കുറിച്ചുള്ള അവബോധം വർധിപ്പിക്കുക എന്ന ലക്ഷ്യത്തോടെ എച്ച്.ഡി.എഫ്.സി. മ്യൂച്വൽ ഫണ്ട് സംഘടിപ്പിക്കുന്ന ‘നാരി നിവേശ് യാത്ര’ യുടെ ആലപ്പുഴ പര്യടനം സമാപിച്ചു.

ജൂൺ 26ന് ചെന്നൈയിൽ നിന്ന് ആരംഭിച്ച ആറുമാസം നീളുന്ന രാജ്യവ്യാപക നിക്ഷേപക വിദ്യാഭ്യാസ-അവബോധ പരിപാടിയുടെ ഭാഗമായാണ് യാത്ര ആലപ്പുഴയിലെത്തിയത്. കളർകോട് മാർക്കറ്റ്, ആലപ്പുഴ മുനിസിപ്പൽ മാർക്കറ്റ്, വൈ.എം.സി.എം മാർക്കറ്റ്, തത്തംപ്പള്ളി മാർക്കറ്റ്, പുന്നപ്ര മാർക്കറ്റ്, വണ്ടാനം മാർക്കറ്റ് എന്നിവിടങ്ങളിൽ പ്രാദേശിക സമൂഹങ്ങളുമായി യാത്രയുടെ ഭാഗമായി നേരിട്ട് സംവദിച്ചു.

സാമ്പത്തിക തീരുമാനങ്ങളിലും കുടുംബങ്ങളുടെ സമ്പത്ത് സൃഷ്ടിക്കുന്നതിലും സ്ത്രീകളുടെ പങ്കാളിത്തം വർധിച്ചുവരുന്ന സാഹചര്യത്തിലാണ് സ്ത്രീകളിലേക്ക് നിക്ഷേപക വിദ്യാഭ്യാസം നേരിട്ട് എത്തിക്കാനുള്ള ഈ പരിപാടി സംഘടിപ്പിക്കുന്നത്.

ലളിതമായി നിക്ഷേപം പഠിപ്പിച്ച് ‘നാരി നിവേശ്’

തെരുവുനാടകങ്ങൾ, നിക്ഷേപക ബോധവൽക്കരണ ക്ലാസുകൾ, സംവേദനാത്മക സെഷനുകൾ, നേരിട്ടുള്ള ആശയവിനിമയം തുടങ്ങിയ രീതികളിലൂടെയാണ് യാത്ര മുന്നോട്ടുപോകുന്നത്. സാമ്പത്തിക ആസൂത്രണം, ലക്ഷ്യാധിഷ്ഠിത നിക്ഷേപം, ചിട്ടയായ നിക്ഷേപ ശീലം, ദീർഘകാല സമ്പത്ത് സൃഷ്ടിക്കൽ തുടങ്ങിയ വിഷയങ്ങൾ ലളിതമായ രീതിയിൽ അവതരിപ്പിക്കുകയാണ് ലക്ഷ്യം.

പരമ്പരാഗതമായി പണം സമ്പാദിച്ച് സൂക്ഷിക്കുന്ന രീതികൾക്കപ്പുറം, സാമ്പത്തിക ലക്ഷ്യങ്ങൾ കൈവരിക്കുന്നതിന് വിവേകപൂർവമായ നിക്ഷേപം എങ്ങനെ സഹായിക്കുമെന്നതും പരിപാടികളിൽ വിശദീകരിക്കുന്നു.

എച്ച്.ഡി.എഫ്.സി. മ്യൂച്വൽ ഫണ്ടിന്റെ ‘ബർണി സെ ആസാദി’ എന്ന നിക്ഷേപക വിദ്യാഭ്യാസ-അവബോധ പരിപാടിയുടെ വിപുലീകരണമായാണ് ‘നാരി നിവേശ് യാത്ര’ സംഘടിപ്പിച്ചിരിക്കുന്നത്.

രണ്ട് വാഹനങ്ങൾ, രാജ്യവ്യാപക യാത്ര

പദ്ധതിയുടെ ഭാഗമായി രണ്ട് പ്രചാരണ വാഹനങ്ങൾ രാജ്യത്തിന്റെ വിവിധ ദിശകളിലൂടെ സഞ്ചരിച്ച് നിരവധി നഗരങ്ങളിലും പട്ടണങ്ങളിലും എത്തും. ഓരോ കേന്ദ്രത്തിലും പ്രാദേശിക സമൂഹവുമായി നേരിട്ട് ഇടപഴകുന്ന പരിപാടികൾ സംഘടിപ്പിക്കും.

സ്ത്രീകളുമായി നേരിട്ട് സംവദിക്കുന്നതിനാണ് യാത്ര പ്രത്യേക പ്രാധാന്യം നൽകുന്നത്. രാജ്യത്തിന്റെ വിവിധ ഭാഗങ്ങളിലെ വനിതാ സ്വയംസഹായ സംഘങ്ങൾക്കായി 60 പ്രത്യേക സാമ്പത്തിക ബോധവൽക്കരണ സെഷനുകളും സംഘടിപ്പിക്കുന്നുണ്ട്.

സാമ്പത്തിക ലക്ഷ്യങ്ങൾ എങ്ങനെ നിശ്ചയിക്കാം, അതിനനുസരിച്ച് നിക്ഷേപം എങ്ങനെ ആസൂത്രണം ചെയ്യാം, ദീർഘകാല സമ്പത്ത് എങ്ങനെ സൃഷ്ടിക്കാം തുടങ്ങിയ വിഷയങ്ങളാണ് ഈ സെഷനുകളിൽ പ്രധാനമായും ചർച്ച ചെയ്യുന്നത്.

സ്ത്രീകളുടെ സാമ്പത്തിക സ്വാതന്ത്ര്യത്തിലേക്ക്

ഇന്ത്യൻ കുടുംബങ്ങളിൽ സ്ഥിരമായി സമ്പാദിക്കുന്നവരിൽ വലിയൊരു വിഭാഗം സ്ത്രീകളാണെങ്കിലും വ്യക്തിഗത സാമ്പത്തിക കാര്യങ്ങളെക്കുറിച്ചുള്ള തുറന്ന ചർച്ചകളും ശരിയായ നിക്ഷേപ അറിവും ഇപ്പോഴും പരിമിതമാണെന്ന് എച്ച്.ഡി.എഫ്.സി. അസറ്റ് മാനേജ്മെന്റ് കമ്പനി ലിമിറ്റഡിന്റെ മാനേജിംഗ് ഡയറക്ടറും ചീഫ് എക്സിക്യൂട്ടീവ് ഓഫീസറുമായ നവ്നീത് മുനോട്ട് പറഞ്ഞു.
ഈ വിടവ് നികത്തുകയാണ് ‘നാരി നിവേശ് യാത്ര’യുടെ പ്രധാന ലക്ഷ്യമെന്ന് അദ്ദേഹം വ്യക്തമാക്കി.

നിക്ഷേപം സങ്കീർണമായ ഒരു സാമ്പത്തിക വിഷയമല്ലെന്നും, സ്ത്രീകൾ ഇതിനകം സ്വപ്നം കാണുന്ന സാമ്പത്തിക ലക്ഷ്യങ്ങളിലേക്ക് എത്തുന്നതിനുള്ള പ്രായോഗിക മാർഗമായി അതിനെ കാണണമെന്നും ബോധ്യപ്പെടുത്തുകയാണ് പരിപാടിയിലൂടെ ലക്ഷ്യമിടുന്നതെന്നും അദ്ദേഹം പറഞ്ഞു.

തെരുവുനാടകങ്ങൾ, സമൂഹ ബോധവൽക്കരണ പരിപാടികൾ, സ്വയംസഹായ സംഘങ്ങളുമായുള്ള സംവാദങ്ങൾ എന്നിവയിലൂടെ നിക്ഷേപത്തെക്കുറിച്ചുള്ള ഭയം കുറച്ച് കൂടുതൽ സ്ത്രീകളെ സാമ്പത്തിക തീരുമാനങ്ങളിലേക്ക് കൊണ്ടുവരാനുള്ള ശ്രമമാണ് യാത്ര.

സ്ത്രീകളുടെ സാമ്പത്തിക അവബോധം ശക്തിപ്പെടുത്തുകയും സ്വന്തം സാമ്പത്തിക ലക്ഷ്യങ്ങളിലേക്ക് കൂടുതൽ ആത്മവിശ്വാസത്തോടെ മുന്നേറാൻ അവരെ പ്രാപ്തരാക്കുകയും ചെയ്യുക എന്നതാണ് ‘നാരി നിവേശ് യാത്ര’യുടെ പ്രധാന സന്ദേശം.

By VOC Media  Business Desk
Last Updated.20 Aug 2026