കൊച്ചി: വ്യാവസായിക കൃത്രിമബുദ്ധി (AI) വികസനത്തിന് കൂടുതൽ വേഗം പകരുക എന്ന ലക്ഷ്യത്തോടെ 37 രാജ്യങ്ങളിൽ നിന്നുള്ള 1,000-ത്തിലധികം ഇന്നൊവേറ്റർമാരെ ഒരുമിപ്പിച്ച് എബിബി ഇന്നോവേഷൻ സെന്റർ (ABB Innovation Center – AIC), എബിബി ആക്സിലറേറ്റർ പരിപാടിയുടെ ആറാം പതിപ്പ് ബെംഗളൂരുവിൽ സംഘടിപ്പിച്ചു.
അഞ്ച് ദിവസങ്ങളിലായി നടന്ന പരിപാടി, ആഗോള തലത്തിലെ പ്രതിഭകളുടെ സഹകരണം എങ്ങനെ പുതിയ ഉൽപ്പന്നങ്ങളും സാങ്കേതിക പരിഹാരങ്ങളും വികസിപ്പിക്കുന്നതിനെ വേഗത്തിലാക്കുന്നുവെന്നും വ്യാവസായിക പരിവർത്തനത്തിന് ആവശ്യമായ ഭാവി പ്രതിഭകളെ വളർത്തുന്നതിൽ നിർണായക പങ്കുവഹിക്കുന്നുവെന്നും തെളിയിച്ചതായി സംഘാടകർ അറിയിച്ചു.
"ആശയങ്ങളെ ഉപഭോക്താക്കൾക്ക് പ്രയോജനപ്പെടുന്ന യാഥാർത്ഥ്യ പരിഹാരങ്ങളാക്കി മാറ്റുന്ന ആഗോള നവീകരണ വേദിയാണ് എബിബി ആക്സിലറേറ്റർ," എന്ന് എബിബി ഇന്നോവേഷൻ സെന്റർ ഡയറക്ടർ ജി.എൻ.വി. സുബ്ബ റാവു പറഞ്ഞു.
എബിബിയുടെ ഏറ്റവും വലിയ ആഗോള സാങ്കേതിക-എൻജിനിയറിംഗ് കേന്ദ്രങ്ങളിലൊന്നായ എബിബി ഇന്നോവേഷൻ സെന്ററിൽ ഗവേഷണ-വികസനം, എൻജിനിയറിംഗ്, ഡിജിറ്റൽ സാങ്കേതികവിദ്യകൾ, ആഗോള പ്രവർത്തനങ്ങൾ തുടങ്ങിയ മേഖലകളിലായി ഏകദേശം 4,000 സാങ്കേതിക വിദഗ്ധരാണ് പ്രവർത്തിക്കുന്നത്.
എ.ഐ., ക്ലൗഡ് കമ്പ്യൂട്ടിംഗ്, ഡിജിറ്റൽ സാങ്കേതികവിദ്യകൾ എന്നിവയുടെ സംയോജനത്തിലൂടെ അടുത്ത തലമുറ വ്യാവസായിക സാങ്കേതികവിദ്യകൾ വികസിപ്പിക്കുക, ഉൽപ്പന്ന നവീകരണം വേഗത്തിലാക്കുക, കൂടുതൽ സ്വയംപ്രാപ്തമായ വ്യവസായ പ്രവർത്തനങ്ങളിലേക്ക് ഉപഭോക്താക്കളെ പിന്തുണയ്ക്കുക എന്നിവയാണ് എഐസിയുടെ പ്രധാന ലക്ഷ്യങ്ങൾ.
മുൻ പതിപ്പുകളുടെ വിജയത്തെ അടിസ്ഥാനമാക്കി വികസിപ്പിച്ചെടുത്ത ആറാം പതിപ്പ്, എബിബിയുടെ പ്രധാന ആഗോള നവീകരണ വേദികളിലൊന്നായി മാറിയിട്ടുണ്ട്. കഴിഞ്ഞ രണ്ട് വർഷത്തിനിടെ 2,000-ത്തിലധികം പേരുടെ പങ്കാളിത്തം ഉറപ്പാക്കാനും എ.ഐ., ഓട്ടോമേഷൻ, ക്ലൗഡ്, ഡിജിറ്റൽ സാങ്കേതികവിദ്യകൾ തുടങ്ങിയ മേഖലകളിൽ ഏകദേശം 700 പ്രൂഫ്-ഓഫ്-കോൻസെപ്റ്റുകൾ (Proof of Concept) വികസിപ്പിക്കാനും ഈ പദ്ധതിക്ക് സാധിച്ചതായി കമ്പനി അറിയിച്ചു.
പരിപാടിയുടെ മികവിനുള്ള അംഗീകാരമായി 2025-ൽ ഹാക്കത്തോൺ വിഭാഗത്തിലെ ഗോൾഡ് സ്റ്റീവി അവാർഡ്, Achievement in Global Collaboration വിഭാഗത്തിലെ ബ്രോൺസ് സ്റ്റീവി അവാർഡ്, കൂടാതെ International Innovation Awards-ലെ Service and Innovation വിഭാഗത്തിലെ പുരസ്കാരവും എബിബി ആക്സിലറേറ്റർ നേടിയിട്ടുണ്ട്.
Courtesy: Accurate Media, Kochi.
Updated. Jul 2026
