രൂപയുടെ മൂല്യം റെക്കോർഡ് ഇടിവിൽ

അന്താരാഷ്ട്ര വിപണിയിൽ ഡോളറിനെതിരെ ഇന്ത്യൻ രൂപയുടെ മൂല്യം എക്കാലത്തെയും താഴ്ന്ന നിലയിലെത്തി.
ദില്ലി:ഡോളറിനെതിരെ ഇന്ത്യൻ രൂപയുടെ മൂല്യത്തിൽ ചരിത്രത്തിലെ ഏറ്റവും വലിയ ഇടിവ് . ഇന്ന് വ്യാപാരം അവസാനിക്കുമ്പോൾ അമേരിക്കൻ ഡോളറിനെതിരെ രൂപയുടെ മൂല്യം 94.82 എന്ന താഴ്ന്ന നിലയിലെത്തി. പശ്ചിമേഷ്യയിലെ യുദ്ധസാഹചര്യങ്ങളും ആഗോള വിപണിയിലെ അനിശ്ചിതത്വവുമാണ് രൂപയ്ക്ക് തിരിച്ചടിയായത്. ഒറ്റദിവസം കൊണ്ട് 86 പൈസയുടെ ഇടിവാണ് രേഖപ്പെടുത്തിയത്, ഇത് സമീപകാലത്തെ ഏറ്റവും വലിയ തകർച്ചയാണ്.
പശ്ചിമേഷ്യയിൽ ഇറാൻ-ഇസ്രായേൽ സംഘർഷം കടുക്കുന്നതും ക്രൂഡ് ഓയിൽ വില ബാരലിന് 110 ഡോളറിന് മുകളിലേക്ക് ഉയർന്നതുമാണ് രൂപയെ തളർത്തിയത്. ഇന്ത്യയുടെ ഇറക്കുമതി ചെലവ് കുത്തനെ ഉയരുമെന്ന ആശങ്കയും വിദേശ നിക്ഷേപകർ ഇന്ത്യൻ വിപണിയിൽ നിന്ന് വൻതോതിൽ പണം പിൻവലിക്കുന്നതും മൂല്യത്തകർച്ചയ്ക്ക് ആക്കം കൂട്ടി. ഈ മാസം മാത്രം ഏകദേശം 10 ബില്യൺ ഡോളറിന്റെ നിക്ഷേപമാണ് വിദേശ നിക്ഷേപകർ  ഇന്ത്യൻ വിപണിയിൽ നിന്ന് പിൻവലിച്ചത്.
രൂപയുടെ മൂല്യം ഇടിയുന്നത് രാജ്യത്ത് പണപ്പെരുപ്പം വർധിപ്പിക്കാൻ കാരണമാകുമെന്ന് സാമ്പത്തിക വിദഗ്ധർ മുന്നറിയിപ്പ് നൽകുന്നു. ഇറക്കുമതി ചെയ്യുന്ന ഇന്ധനം, ഇലക്ട്രോണിക്സ് ഉപകരണങ്ങൾ, അസംസ്കൃത വസ്തുക്കൾ എന്നിവയ്ക്ക് വില കൂടുന്നത് സാധാരണക്കാരന്റെ കുടുംബ ബജറ്റിനെ ബാധിക്കും. പ്രവാസികളെ സംബന്ധിച്ച് നാട്ടിലേക്ക് പണമയക്കുമ്പോൾ കൂടുതൽ തുക ലഭിക്കുമെന്നത് ആശ്വാസകരമാണെങ്കിലും രാജ്യത്തെ വിലക്കയറ്റം ഈ നേട്ടത്തെ ഇല്ലാതാക്കിയേക്കാം.
അതേസമയം, രൂപയുടെ തകർച്ച തടയാൻ റിസർവ് ബാങ്ക് (RBI) വിപണിയിൽ ഇടപെടുന്നുണ്ട്. വിദേശനാണ്യ ശേഖരം ഉപയോഗിച്ച് മൂല്യമിടിവ് നിയന്ത്രിക്കാനാണ് നീക്കം. എന്നാൽ അന്താരാഷ്ട്ര തലത്തിൽ ഡോളർ കരുത്താർജ്ജിക്കുന്നതും യുദ്ധഭീതിയും നിലനിൽക്കുന്നതിനാൽ വരും ദിവസങ്ങളിലും രൂപയുടെ മൂല്യം 95 കടന്നേക്കുമെന്നാണ് വിപണി നിരീക്ഷകരുടെ വിലയിരുത്തൽ.